| |
|
| |
 |
| |
Major Speeches |
|
| |
|
|
|
|
Back to Major Speeches
February 14, 2008
Iroij im Leroij ro ilo ailin in im aolep ro jet ilo belakin in Majol in, Chairman Loeak, Speaker Zedkaia, First Lady Emlain Kabua, Alap ro kajojo, Ri-kaki rein jemed, Senator im Cabinet Minister ro, ri-kwelok ro an Kwajalein non Nitijela eo, Mayor im ro iuan Council eo, Ambassador eo an America im rutiej ro mottad jen USAKA, Ambassador Linghu, ro ilo jukjuk in bed in ion Ebeje im ko jet iloan ailin in, im komwoj aolep.
Moktata, kamolol Anij kin onake eo An non Aelon Kein im non kijwoj kajojo.
Elap ao monono im kamolol kin kir eo jen ritel ro an Kwajalein non kobatok non kemem-e rainin eaurok non armij in Kwajalein im jukjuk in bed ko kajojo ion ailin in.
Ij bok ien in non jakewaj naan in yokyokwe im kojeramon jen armij in Majol im Kien eo aer non kom ilo ad kemem-e rainin eaurok.
Jooj ej kwelok tok ijin, jaab non kememij wewein ko rebin jekar jelmae im iooni elon yio ko remwotlok, ak men eo aurok lok ilo ad iben dron kio ej non ad monono im kamolol kin mour in anemkwoj, mour in ainemon, im mour in yokwe im jela nae dron.
Elap ao emloke ritto ro ad im lemnak kin Manit eo ad----eo ej aiin kij im kejbarok kij. Mol, elane ekar jab Manit in ad, im ej korak eo ej likwoj kijwoj iben dron, innem ejelok kajitok ke lal in ad enaj kar madeoneon-lok im jako wot etto.
Ij kamolol bwe trip eo kein-karuo ao in non Ebeye in iloan juon wot allon. Menin ej kalikar an Kien eo ikdrelel non emakit im kajjeon na-mejlan jet ian aban ko jukjuk-im-bed in adwoj I-aelon in ej jelmae.
Kom naj reito-reitak im lo elon ian minister ro rebed ijin. Rar lo-tok kom non aer lale ewi wewin an Ministry ko maron kakmanmanlok service non armij ro rej jukjuk im amnak ion Ebeye in.
Ejelok kajitok ke Kien ej aikuj komane ijo kunan ilo juon tore eo emokaj non kabidodoiklok mour non armij ro ion Ebeye in. Einwotke tomak eo in ‘ARMIJ RO MOKTA.’
Kin menin, ij elij kalimur eo ao bwe Kien enaj kojerbal aolep wewein ko rekar im rebed iben non kokmanmanlok mour non aolep armij in Majol.
Ij kajitok ibben ritel rein an Kwajalein im aolep jukjuk in bed ko iloan ailin in bwe jooj en kijenmij ibben dron im letok jirik ien non an Kien eo jerbale aban kein.
Joij im melele bwe aban ko jukjuk-im-bed in im Majol in jimor rej jelmae rej jet ko rebin im enaj bok elap ien im elap money.
Rainin, jooj jela im melele ke mottan wot 8 yio im enaj jemlok melim eo non kojerbal Kwajalein.
Kotobar eo an Kien ej non jerbal ibben America im Armij in Kwajalein non kadedeiklok juon koon kaal.
Kien in ad emelele kin aikuj eo elap an America kin National Security im eddo ko an non drebij ainemon ibelakin lal in. Kin tomak in, Kien in ej rieklok konan eo an America non kojerbal Kwajalein iumin bar 70 yio elikin 2016.
I-konan bareinwot karon armij in Majol ke Kien in ej rejetak im jutak iben armij in Kwajalein im kotobar ko aer non bukot juon jekjek eo emonlok non ir kab ro driktak-ir tokelik.
Kin konan eo non jiban armij in Kwajalein im America jimor, Kien in ej kio jelmae im lontak kin ruo wewin ko: Juon, Kien ejjab maron ajelok non America bwidrej ko ejjab mweien im ejelok an maron ie, im ruo, Kien in emojno im elikjab bein non na-kolla ko re-jejjet non kajitok ko an armij in Kwajalein.
Mwekerta ebwe an bin wewin in, ak Kien in emoj an kalimur ke enaj jerbale menin.
Emoj ao kenanik Ambassador Bishop bwe Kien in an Majol enaj eiik jet elmakot ko nan kajeon mejal aban in non kijwoj aolep. Elmakot kein renaj itok non armij in Kwajlein im bar ilok non Kien eo an America bwe jooj aolep lemnak kaki.
Rainin ij kajitok melele im karejar an armij in Kwajalein im Kien eo an America ilo tore in ke Kien in ej komaat an maron non bukot juon jekjek eo emon non armij in Kwjalein, emon non Kien eo an America, im bareinwot emon non Kien eo an Majol.
Im ilo ad wonmanlok im jerbal ibben dron, ij kajitok bwe jooj aolep jar im kajitok ibben Anij Jemed ilan bwe en lutok tiriamo im kejramon eo An iod im ion Republic in ad.
Anij en kejramon kijowj aolep.
Back to Major Speeches |
|
|
| |
|
|
|
